लापरवाही से बच्चा कै मउत

जिला फैजाबाद, ब्लाक मया, गांव छतरा। यहि गांव के सीता कै डिलेवरी जिला अस्पताल मा 21 सितम्बर का भै। नर्स के लापरवाही के कारण चौबीस घंटा मा बच्चा कै मउत होइगै। सीता पति रामजतन यादव बताइन कि हमरे सब पहिले बाकरगंज उपस्वास्थ्य केन्द्र पै गयन तौ हुंआ  कै ए.एन.एम. नीलम त्रिपाठी कहिन कि बच्चा तनदुरूस्त बाय। इनका लइके जिला महिला अस्पताल जा। तब हमरे सब एम्बूलेंस से लइके गयन तौ भर्ती करायन। लगभग दस बजे रात मा लड़का भै। बारह बजे के बाद बच्चा कै तबीयत खराब हुवय लाग। तबियत खराब हुवत देख सीता कै बहिन सुषीला स्टाफ नर्स के पास चार बार गइन। कहिन चला देख लिया बच्चा कै हालत ठीक नाय बाय, तौ डांट के भगाय दिहिन। सुबह चार बजे आय के देखिन लकिन डाक्टर का नाय बुलाइन। गेदहरा कै हालत खराब हुवय से मउत होइगै। गेदहरा भा रहा तौ चार हजार रुपया लिहे रहिन। कउनौ चीज कै सुबिधा नाय दिहिन। जब बच्चा खतम होइगै तौ हमरे सब आवाज उठायन। जिला से एस.पी. अउर डी.एम. आय के आष्वासन दिहिन। सी.एम.ओ. डाक्टर निर्मल कुमार श्रीवास्तव कहिन कि जांच कराये के बाद लापरवाही करै वाले का सजा मिले।