नहर मा पानी छोड़ै

या हवै नहर का हाल

जिला चित्रकूट, ब्लाक मानिकपुर, रामनगर अउर मऊ। इं ब्लाक मा गांवन के नहरन मा सिंचाई विभाग कइती से पानी नहीं छोड़ा गा। यहै कारन हजारन किसान परेशान हवैं। या समस्या लगभग दस बरस से हवै।
ब्लाक मानिकपुर, गांव ऐंचवारा। हिंया के अर्जुन प्रसाद का कहब हवै कि ओहन नहर से गेहूं के फसल का सीचैं खातिर पानी नहीं मिलत आय। या कारन हजारन रूपिया का नुकसान होइ जई।
सेमरदहा गांव के कमल अउर राम कहिन कि खेती किसानी करित हन। गेहूं का सीचैं मा पानी लागत हवै। ओहन नहर देखै खातिर हवै। नहर मा पानी छोड़ै खातिर एक महीना पहिले डी.एम. बलकार सिंह का लिखित दीन गे रहै, पै कउनौ ध्यान नहीं दीन गा आय।
मऊ ब्लाक, गांव खण्डेहा का पुरवा चकवा। हिंया के समयलाल के आठ बीघा जमीन अउर रामबहोरी के सोलह बीघा हवै। उंई कहिन कि पिछले बरस भी नहर मा पानी नहीं छोड़ा गा रहै। या दरकी भी वहै हाल हवै। अपने जमीन मा गेहूं, मसूर, अउर सरसों बोये हन। पानी न मिलै के कारन फसल खराब होय के कगार मा हवै।
ब्लाक रामनगर, गांव सिरावल का पुरवा सिलौटा। हिंया के संजय सिंह के सौ बीघा जमीन, आश्रम के डेढ़ सौ बीघा, मनोहर के पांच बीघा जमीन हवै। इं नहर से सिचाई नहीं कइ पावत हवैं। काहे से कि वहिमा पानी नहीं आय। मानिकपुर सिंचाई विभाग के जेई अजय सिंह का कहब हवै कि किसानन के समस्या दूर कीन जई। यहिके खातिर डी.एम. बलकार सिंह का लिखित दीन गे हवै।
डी.एम. बलकार सिंह का कहब हवै कि जिला के नहरन का पांच फुट गहरी करा दीन गे हवै। यहिके साथै सफाई भे हवै। नहर मा पानी छोड़ा दीन गा हवै। अब किसानन का पानी मिली।