हर तरफ बढ़ा आगि कै कहर

फैजाबाद अउर अम्बेडकर नगर मा आगि कै कहर यतना ज्यादा बढि़गै बाय कि एकौ दिन एस नाय बाय कि कहूं आगि न लागि हुवय। आगि लागै से केतना मनई अउर जानवर जरिके मरि गइन। चाहे ऊ विजली से आगि लागि हुवय या फिर अन्य कउनौ कारण से।
एक तरफ पानी कै संकट दुसरी तरफ आगि के कहर से मनई परेशान होइगा हइन। तेज हवा के कारण आगि विकराल रुप धारण कै लियाथै जेसे देखतै देखत कइयौ घर जरिके राखी होइ जाथिन। कहूं कहूं विजली कै तार शार्ट हुवय से आगि लागै कै घटना सामना आवति बाय। मया ब्लाक के काजीपुर मांझा मा आगि लागै से एक पांच साल के बच्ची अउर दुई भइस कै जरिके मउत होइगै। घर कै एकौ सामान नाय बचा जवन मनई कपड़ा पहिरे रहिन उहै बचा। वहि तरह तारुन ब्लाक के पड़ेलवा गांव मा करंट उतरै से दुई मनई कै मउत अउर चार जने घायल होय गइन। जेहमा विद्युत कार्पोरेशन कै लापरवाही सामने आवति बाय। गांव वाले के कइव बार सूचना दियै के बावजूद विभाग वाले ध्यान नाय दिहिन। आखिर मा हादसा होइगा। अउर मनइन कै जान चलीगै।
यहि तरह के घटना मा अगर विभाग वाले चेत गा होतिन तौ शायद आज ई घटना न हुवत। यहि लिए मनइन का चाही कि हमेशा बाल्टी मा पानी भरिके रखै जेसे कउनौ भी दिक्कत हुवय तुरन्त पानी मिल सकै। मनइन का आगि के कहर से बचै के ताई पहिले से सचेत रहै कै बहुत जरुरत बाय। जेसे यहि तरह कै घटना न होय पावै।