खबर लहरिया बुंदेलखंड साठ साल से खुलो नाला लोग परेशान

साठ साल से खुलो नाला लोग परेशान

WWजिला महोबा, ब्लाक पनवाड़ी, कस्बा पनवाड़ी ,मोहल्ला बजनापुरा, वार्ड नम्बर पांच मे साठ साल पुरानो नाला बनो हे। जोन खुला परो हे। आये दिन बच्चा गिरत हे। जीसे कभऊं घटना हो सकत हे।
जितेन्द्र कहत हतो की जो हमाये एते को नाला बेदौ गांव से आओ हे। जोन साल साल पुराने आये। साठ साल से खुला परो हे। जीसे आये दिन बच्चा गिरत हे। बन्द करायें के लाने कोनऊ ध्यान नई देत हे।
अजुधी बताउत हे कि ई नाला में मोओ लड़की एक महीना पेहले गिर गओ हतो, ओते के कछू लोगन ने देख लओ हतो। जीसे नाला से जल्दी निकार लओ। हमे तो चिन्ता रहत हे कि ई नाला मे कोनऊ गिर न जाये।
जितेन्द्र कहत हे कि आठ दिन पेहले मोओ बच्चा भी ई नाला में गिर गओ हतो, एक आदमी ने बच्चा खा गिरत देख लओ, ऊ नाला में कूद गओ ओर बच्चा खे निकार लओ। अगर ओते ऊ आदमी न होतो तो ऊ दिन हमें अपनो बच्चा दिखे खा न मिलतो। ऊ आदमी हमाये लाने भगवान हो गओ। ई नाला से बड़े परेशान रहत हे। अगर कोनऊ की शादी होत हे तो डर लगो रहत हे कि कोनऊ नाला में न गिर जाये। काय से ऊ नाला में अभे तक तीन चार लोग गिर गये चुके हे। जा नाला बन्द हो जाये तो नींक हो हे। हमें नाला की सबसे ज्यादा परेशानी रहत हे। हम अपने बच्चन खा किते तक घर के भीतर करे रेहे, दिन भर में बच्चन खे भी लगन लगत हे कि कभे खेले खा बाहर मिल जाये। तीन साल पेहले तहसील में दरखास दई हती। लेकिन कोनऊ सुनवाई नई भई हे।
प्रधान अखिलेश कुमारी को आदमी संजय दुबे कहत हतो कि में ऊमें का कर सकत हो ऊखी चौड़ाई ज्यादा ओर लम्बाई हे। मोये खाता मे अभे तक बजट भी नई आओ मेने अपने घर के रूपइया से काम कराओ हे। बजट आ जेहे तो चारऊ केती से बाउन्ड्री बनवा दई जेहे।

रिपोर्टर – सुरेखा राजपूत