जिला महोबा, ब्लाक जैतपुर, कस्बा कुलपहाड़ कोतवाली क्षेत्र मे 31 मई खा शशि नाम की ओरत खा परिवार के प्रवीण नाम के आदमी ने मारपीट करी हती। जीखी दरखास शशि ने कुलपहाड़ कोतवाली मे दई हे।
एते की शशि को बताउत हे की माई शादी के बारह साल हो गये हे। छह साल से सास ओर देवर मोये बोहतई परेशान करत हे। कछू कहत हों तो मारपीट करत हे। मोये देवर प्रवीन ने केऊ दइयां मारो हे। 31 मई खा सास मोये पानी भरे खा कहो हतो। नल न आयें के कारन मेनें पानी नई भरो। जीसे सास मोये गाली देन लगी मेने गाली देय से मना करो। मे अपने कमरे मे हती। तभई देवर आओ ओर मोये बाल पकर के मारन लगो। आदमी बाहर दुकान मे बेठो हतो, जभे कोनऊ ने बताओ की आदमी ने आके छुड़ओ हतो। मोये शरीर मे गम्भीर चोट आई हे। छह साल से देवर छोटी-छोटी बातन पे मारपीट करत हे। जान से मार देय की धमकी देत हे। एई से मेने देवर के खिलाफ कुलपहाड़ कोतवाली में दरखास दई हे।
देवर प्रवीण कहत हे की भाभी मताई से लड़त हती। जीसे गुस्सा के कारन मेने मार दओ हे। मे गलती मानत हों अब कभऊं न मारहों
कुलपहाड़ कोतवाली को कोतवाल सतीश चन्द्र शुक्ला कहत हे की घर-घर को मामला हे। समझौता करा दओ हे।
रिपोर्टर – श्यामकली, सरोज सैनी