सड़क मा लागत जाम

जिला चित्रकूट, ब्लाक रामनगर,कस्बा राजापुर। हिंया सडक़ के किनारे सब्जी लगावैं वाले कुछ मड़इन का कहब हवै कि पुलिस परेशान करत हवै। यहिसे सब्जी बेचै मा समस्या आवत हवै। यहिके खातिर टाउन एरिया अउर एस.डी.एम.चंद्र प्रकाश उपाध्याय का 10 अक्टूबर का लिखित दरखास दीन गे हवै।
सब्जी लगावै वालेन का कहब हवै कि हम अपने खेत से सब्जी ला के सड़क के किनारे लगा के बेंचित हन। यहिके अलावा हमरे अउर कउनौ दूसर काम धंधा भी नहीं हवै। सब्जी बेंच के ही अपने परिवार वालेन का पेट भरित हन। अगर एक दिन सब्जी न बेंची तौ वा दिन हमरे घर मा चूल्हा तक नहीं जल सकत हवै। येत्ती समस्या से परेशान होय के बादौ हमार कउनौ ध्यान नहीं देत हवै। यहिसे लिखत एस.डी.एम. अउर राजापुर टाउन एरिया वालेन से नियाव के मांग करिन हवै। राजापुर ए.डी.एम. चंद्र प्रकाश उपाध्याय का ककहब हवै कि लिखित मिल गे हवै। जांच कीन जई।
राजापुर टाउन एरिया के अधिशाषी अधिकारी हासिम अली कहिन कि सब्जी वाले सड़क के किनारे सब्जी बेंचत हवै। यहिसे सड़क मा निकरै वाले मड़इन का समस्या होत हवै।