जिला बांदा, ब्लाक तिन्दवारी, गांव महेदू के हुलासी प्रसाद पुत्र रामकुमार कुशवाहा का आरोप है कि उनका गांव 2013-14 मा लोहिया समग्र गांव के तहत चुना गा रहै। जेहिके तहत गांव मा लोहिया आवास खातिर 22 लोगन के सूची बनाई गे रहै। जेहिमा मोर भी नाम रहै, पै आवास नहीं दीन गा आय।
हुलासी प्रसाद पुत्र रामकुमार का कहब है कि मैं बी.पी.एल. कार्ड धारक हौं। मोरे पास कृषि योग्य जमीन भी निहाय न पक्का मकान आय। कच्चे घर मा छप्पर डाल के बसर करत हौं, पै आवास के नाम मा 2013-14 से अबै तक भरोसा बस मिलत आवत है। आवास नहीं दीन जात आय। या मामला के जांच करावैंं खातिर मै 2013-14 से लइके अबै तक मा ब्लाक से लइके जिला तक हजारन दरखास दई चुकेंव, पै कउनौ सुनवाई नहीं भे आय। 28 मई का फेर से डीएम का दरखास दइके जांच के मांग करे हौं। अगर अब सुनवाई न होई तौ अनशन करिहौं। अधिकारी हर दरकी मोहिका भरोसा दइके टाल देत हैं।
तिन्दवारी बी.डी.ओ. ओ.पी. शुक्ला का कहब है कि वा लोहिया आवास मांगत है। जबैकि हम इन्द्रा आवास दीन है, पै नहीं लेत आय। लोहिया आवास गरीबी रेखा से नीचे वालेन का मिलत है। जबैकि हुलासी प्रसाद का नाम लोहिया आवास वाली लिस्ट मा शामिल भी कीन जा चुका है।
रिपोर्टर – शिवदेवी