जिला चित्रकूट, ब्लाक मानिकपुर,गांव डोड़ामाफी के प्रधान गया प्रसाद कोल के 26 मई का अचानक मउत होइगे। अचानक मउत होय के कारन मानिकपुर थाना मा पुलिस का सूचना दीन गे। काहे से कि परिवार वालेन का शक हवै कि कउन कारन हवै जेहिसे वहिके मउत होइगे।
रामकेस का कहब हवै कि मोर चाचा गया प्रसाद कोल के उम्र लगभग अड़तालिस साल रहै। वा या पंचवर्षीय मा प्रधान पद जीत गा रहै। 26 मई का चाचा बिजाहना पुरवा तक गे जइसेन हरदौल पहुंचे तौ उनका चक्कर आ गा अउर वा घर मा आ के पर गे। वा समय हम लोग मानपुर जात रहेन। जइसेन पता लाग कि चाचा के तबियत खराब हवै। उनका मझगवां दवाई करवावैं लइके जात रहेन तौ उनके मउत होइगे। लाश का पोस्टमार्टम करावा गा तौ पुलिस कहत रहै कि पोस्टमार्टम रिपोर्ट आवैं के बाद पता लागी के कसत मउत भे हवै।
मानिकपुर थाना के दरोगा साजिद अली खान का कहब हवै कि गया प्रसाद कोल के लाश का बिसरा लखनऊ मा भेज दीन गा हवै। यहिके जांच होय मा दुइ महीना भी लाग सकत हवै। जांच होय के बाद पता लाग सकत हवै।
ब्लाक कर्वी, गांव अमानपुर का अतुल कहिस कि चाचा नरेन्द्र जून का बिजली के लाइन बनावत रहै तबहिने वहिके करंट लाग गा जेहिसे वहिके दरे मा मउत होइगे। लाश का धइके रोड मा जाम लगावा गा मउके मा कर्वी एस.डी. एम. रजनीश कुमार मिश्र अउर कर्वी विधायक वीर सिंह पटेल आय रहैं। वीर सिंह भरोसा दिहिन कि मुआवजा देवावा जई।
मरै वाले नरेन्द्र के भतीज अतुल का कहब हवै कि चाचा बिजली विभाग मा संविदा मा रहै। 31 मई का बिजली के लाइन खराब होइगे रहै। यहिसे वा खम्भा मा चढ़ के सुधारत रहै। वहिके करंट लाग गा अउर मर गा। चाचा के तीन छोट छोट लड़की हवैं। उनका पालन पोषण कउन करी। कर्वी एस. डी. एम. रजनीश कुमार मिश्र का कहब हवै कि दुर्घटना के तहत पांच लाख रुपिया, पारिवारिक लाभ के तहत बीस हजार रुपिया अउर वहिके औरत का वहिके जघा मा नौकरी दीन जई।
रिपोर्टर – खबर लहरिया ब्यूरो