खबर लहरिया औरतें काम पर लड़की के ससुराल मा मउत, जला के मारै का आरोप

लड़की के ससुराल मा मउत, जला के मारै का आरोप

जिला बांदा, ब्लाक जसपुरा, कस्बा जसपुरा। हेंया के राकेश का आरोप है कि वहिके पचीस साल के लड़की मंजू का ससुराल वाले दहेज के कारन जला के मार डालिन। साथै या भी आरोप है कि ससुराल वाले राजी न होय मा जान से मारैं के धमकी दिहिन।
राकेश का कहब है-“मोर लड़की मंजू के शादी 2014 के फागुन महीना मा गांव सिंधनकलां मा भे रहै। शादी के समय खूबै दान दहेज दीन, पै उंई लालची ससुराल वालेन का यतने दहेज से जी नहीं भरा। शादी के बाद एक लाख रूपिया अउर दहेज मांगै लाग। हम रूपिया नहीं दई पावा तौ 18 अक्टूबर 2014 का मिट्टी का तेल डाल के जला दिहिन। जबै हमका लड़की के मउत का पता चला तौ पता चला कि मार के जला दिहिन हैं। जबै हम थाना गयेंन तौ रपट नहीं लिख गे है। पुलिस कहत है कि लड़की खुदै जल गे है। ऊपर से लड़की का जेठ बब्लू एक लाख रूपिया लइके समझउता करैं का फोन से कहिस है। समझउता न करैं मा जान से मारैं के धमकी दिहिस है।“
जेठ बब्बू कहिस कि मंजू अउर मोर भाई खुदै आपस मा लड़ाई करिन। मंजू लड़ाई के बाद आगी लगा के जल गे है।
जसपुरा थाना का दरोगा शिवसागर का कहब है कि 19 अक्टूबर का हम जांच करैं गये रहन। जांच मा मोहल्ला अउर घर के लोगन से पता चला कि वा खुदै आगी लगाइस है। या मारे आगे कुछ कारवाही नहीं भे आय।