रास्ता चल गेल पोखर में

जिला सीतामढ़ी, प्रखण्ड बथनाहा, पंचायत रूपौली रूपहरा, गांव जोका। उहां पुरे गांव के लोग के चले वाला मेन सड़क हई। उ पुरा सड़क के मिट्टी कट-कट के पोखड़ में चल गेल हई। लोग बगल के जमीन पर अवई जाई छथिन। ओई सड़क पर सोलिंग भेल हई जे कुछ दूर तक टूट गेल हई। ओई सड़क के लम्बाई एक सौ पैंतालीस फीट अउर चैड़ाई पन्द्रह फीट हई।
उहां के लोग बचन राय, हरदेव राय कहलथिन कि गांव के दुनु ओर अच्छा सड़क हई। लेकिन पोखड़ी रहे से एतेक दूर सड़क खराब हो गेलईं। अगर पोखड़ के काते काते ईंटा के दीवाल देल गेल रहतियई त उ सड़क न टुटतीयई। लोग कहिया तक दोसर के जमीन होके अतई जतई। लोग के ऐतेक परेशानी होई छई लेकिन पंचायत के कर्मी सब के ध्यान एई पर न हई। बगल के जमीन वाला आनन्द राय अउर दौलत देवी कहलथिन जब कोई अधिकारी ध्यान न देई छथिन त हम आपन जमीन घेर लेवई तब लोग केना अतई जतई।
मुखिया श्री कांत उर्फ बब्लू कुमार कहलथिन की सोलिंग पन्द्रह साल पहिले भेल रहई जे टूट गेलई। अब उखाड़ के सोलिंग करवा देव।
बी.डी.ओ. मोहम्मद कलामुददीन कहलथिन इ काम मुखिया के हई पंचायत के ग्राम सभा में एई प्रस्ताव के रखथिन। उ पास हो जतई तब सोलिंग अउर पोखड़ के घेराव के काम करथिन।