मया मा बनत बाय आधार कार्ड

जिला फैजाबाद, ब्लाक मया। हिंआ प्राथमिक विद्यालय पै 7 जून 2014 से आधार कार्ड बनै का शुरू भै बाय पूरे मया ब्लाक के मनईन कै बनत बाय।
रेखा, कंचन बताइन कि हमरे सब आपन फारम जमा कै दी थै तौ शाम होय जाथै नम्बरै नाय आवत। इहै हाल एक हफ्ता से लाग बाय। जे मनई पीछे कै आवाथै ऊ आपन नाम लिखाय के फारम जमा कईके चला जाथिन । छोट जात वालेन कै फारम उलट-पलट के नीचे कै दिया थिन।
मंजू गौड़, विरेन्द्र, मिठाईलाल बताइन कि ई आधार कार्ड खातिर बहुतै बवाल हुअत बाय सारा दिन यहि गर्मी मा लाइन लगाय के खड़ा रहा तबौ एक दिन मा फार्म जमा नाय होय पावत। पता नाय यसे कउनौ लाभौ होय या सब दिखावा हुअत बाय खाली जिला से आय के कम्प्यूटर पै नाम लिखत बाटिन।
बी.डी.ओ. महेन्द्र देव बताइन कि ई योजना बहुत पहिले आय रहा बीच मा बन्द होय गै रहा लकिन सरकार फिर चालू करे बाय। जैसे पहचान पत्र कै मान्यता रहा वैसे यहु कै मान्यता रहे। गाओं से लइके बैंक, परदेष, नौकरी, योजना कै लाभ बिना यकरे न मिलै यसे ई पता चले कि भारत कै कुल जनसंख्या केतनी बाय। पैदा हुअय वाले बच्चा से लइके बूढ़ तक कै आधार बनत बाय ई कार्यक्रम तब तक चले जब तक पूरा मया ब्लाक कै सब ग्रामसभा कै फार्म न भर उठे।