बीस साल से सड़क पै घर, सरकार कै कउनौ ध्यान नाय

जिला अम्बेडकर नगर, ब्लाक अकबरपुर, कस्बा धरिकार कालोनी। एक तरफ नेता अउर सरकार सबका वोट डालै का कहत बाय अउर दूसरी तरफ कइयौ यस मनई अहैं जवन सालन से एक ही जगह रहत अहैं पर उनके पास कउनौ सरकारी प्रमाण पत्र नाय बाय अउर कउनौ भी लाभ कै पात्र नाय अहैं। उनके वोट की ताई काव होये?
षादी कै डाल बनावै वाले कुछ सोलह परिवार हिंआ बीस साल से रहत हइन। पर अबहीं ले प्रमाण पत्र तक नाय बना बाय, वोटर आई.डी. तौ दूर कै बात आय। झोपड़ी बनाय के सड़क के किनारे रहत हइन। इनके खातिर कउनौ प्रकार कै लाभ नाय बाय। गुड्डू अउर कंचन बताइन कि हमार घर आजमगढ़ जिले मा बाय। हिंआ पै अपने परिवार का साथे लइके कइयौ सालन से हई। हम गांव-गांव से बांस खरीद के लै आई थी। एक बांस डेढ़ सौ रुपया कै मिलाथै। लाय के काटब अउर चीर छील के दौउरा, डाल, झबिया बेना बनाय के बाजार मा बेचा जाथै। सौ रुपया दौउरा बाय, बीस कै झबिया बेना डाल तौ डेढ़ सौ बिकात बाय। मेहनत के हिसाब से ज्यादा पैसा नाय मिलत पर इहै हमार रोजी बाय।