बम फेंकै से एक कै मउत, ग्यारह घायल

जिला अम्बेडकरनगर, ब्लाक कटेहरी, गांव  बहोरिकपुर। हिंआ दुई पक्ष मा जमीन के विवाद मा 18 अप्रैल 2016 कै सुबह लगभग दस बजे चीनी मिल मिझौड़ा 6 नम्बर गेट के सामने मारपीट भै। वही मौके पै बम भी फेका गै। यही कारण एक मनई कै मउत होइगै लगभग ग्यारह मनई घायल होई गइन।
गांव  के मनईन कै कहब बाय कि सुरेन्द्र कुमार दूबे अउर रामवचन तिवारी के बीच मा एक साल से जमीन की खातिर विवाद चलत रहा। चीनी मिल मिझौड़ा 6 नम्बर गेट के सामने रामवचन तिवारी कै चाय पानी कै दुकान बाय। सात आठ मनई रामवचन का रोकी कै लात घूसा, डंडा से मारै लागिन। गोहार लगावत घर के तरफ भगिन। फोन से घरे सूचना दिहिन गांव  से पचास साठ मनई लाठी डंडा लइकै पहुचिन। दुकान मा तोड़ फोड़ पत्थर बाजी फायरिंग करै शुरू कीहिन। वही दुईनौ पक्ष मे से कउनौ मनई बम फेक दिहिस। बम विस्फोट होय से रामवचन पक्ष कै प्रवेश पाण्डेय बेटवा जगदम्बा प्रसाद कै मउत होईगै। दुईनौ पक्ष कै लगभग ग्यारह मनई घायल हईन।
सूचना पै पहुचिन भीटी थाना कै एस.ओ.घायलन का अस्पताल पहुचाइन। मृतक मनई का पोस्टमार्टम की खातिर भेज दिहिन। अनिल, सोनू अनूप आदि घायलन कै हालत ज्यादा गम्भीर होय के कारन जिला अस्पताल से लखनऊ ट्रामा सेन्टर रेफर कै दिहिन।
भीटी थाना कै एस.ओ. सुमेश्वर सिंह कै कहब बाय कि जगदम्बा पाण्डेय के तहरीर पै रामवचन उनकै बेटवा प्रिंस, आर्दश आश्वनी अउर रामरतन के खिलाफ केस दर्ज बाय। दुसरे पक्ष कै शैलेष कुमारी के तहरीर पै सर्वेश, संजय, मृतक प्रवेश पाण्डेय के खिलाफ केस दर्ज बाय। दुईनौ पक्ष के आठ मनई का गिरफ्तार कइके चलान कई दिया गै। जांच के बाद आगे कार्यवाही होये।