1 जनवरी 2018 जब पूरा शहर नये साल के जश्न मा डूबा रहा तब फैजाबाद जिला के ब्लाक तारून गाँव कोरोराघव पुर मा आठ साल के दिब्यांशू सिंह कै लाश गन्ना के खेत मा मिली। परिवार वाले कै आरोप बाय कि 31 दिसंबर का मोटरसायकिल सिखावै के बहाना गांव कै सुधीर अउर सीतल बुलायके गन्ना के खेत मा निर्मम हत्या कै दिहिन। पुलिस आरोपी का गिरफ्तार कइके जेल भेज देहे बाय।
गीता सिंह मृतक के अम्मा कै कहब बाय की कुछ नाय भा रहा धोखा से हमरे बेटवा का मारि डारिन। दशा देवी बच्चे के दादी कै कहब बाय कि सुधीर अउर शीतल सिंह बुलाय के लै गए गाड़ी सिखावै झगरा लड़ाई कबहूँ नाय भए बिना गलती के बोटी-बोटी हमरे बच्चा का काट डारिस।
खुशबू सिंह मृतक बच्चे के बहन कै कहब बाय कि मुंह मा कपड़ा ठूसके टेप से चिपकाय देहे रहे अउर हाथ बाँधके गन्ना के खेत मा काट डारिन।
निरकुस सिंह पड़ोसी कै कहब बाय कि बारह बजे जब गायब भा तौ हर जगह खोजा गा लकिन नाय मिले तौ सब सोचिन की रिश्तेदारी मा गा होइहैं। जब नाय मिले तौ 100 नंबर पै फोन किन गा छानबीन भए। गन्ना के खेत के पीछे कुआं मा चप्पल अउर गन्ना के खेत मा टुकड़ा-टुकड़ा लाश मिली।
रिपोर्टर-कुमकुम यादव
Published on Jan 4, 2018
