जिला महोबा, ब्लाक कबरई, गांव सुरहा एते की 30 साल की ओरत गुड्डन 27 जुलाई खा मर गई हे। मायके वालेन ने ससुराल वालेन के ऊपर फांसी लगा के जान से मारे को आरोप लगाओ हे। पुलिस ने लास को पंचनामा भर पोस्टमार्टम खा भेज दओ हे।
गुड्डन को बाप रामलाल बताउत हे कि सात साल पेहले सुरहा गांव में जयराम पुत्र नीरज प्रजापति के साथे शादी करी हती। ससुर दारू को बोहतई आदि हे पूरो दहेज बेंच के बहा दओ। गुडड्न कछू कहत हती तो मारपीट करत हते ओर अलग कर दओ। बहन बताउत हे कि अभे पन्द्रह दिन पेहले फोन आओ हतो। तभई गुड्डन बताउत हती की सुसर ने पड़ोस के आदमी खा दारू पिबा के मोये गाली गलौज कराई हे। मिट्टी को तेल डार दओ जान मारे की बात कहत हते। हमने सोचो की घर को आपसी मामला हे ठीक हो जेहे। 27 जुलाई खा ससुराल वालेन ने गुडड्न को गला दबा के मार दओ हे। काय से ससुराल वालेन ने हमें फोन करके नई बताओ हे। गुडड्न की नन्द ने फोन से बताओ हे। हमने पड़ोस को नम्बर मिलो ओर फोन करो तभे पता चलो की लास कबरई थाना आ गई हे। गुड्डन के शरीर में मार के निशान हे।
कबरई थाना के एस.ओ. चंचल यादव बताउत हे के दरखास मिले ओर पोस्टमार्टम रिपोर्ट आयें के बाद मुकदमा लिखो जेहे। अभे तक गुड्डन के परिवार वालेन ने दरखास नई दई हे।