प्रधानाध्यापक पै केस दर्ज

जिला फैजाबाद, ब्लाक पूराबाजार, गांव  सरायरासी। हिंआ एक प्राइवेट स्कूल मा पढ़ै वाले छात्र का 15 दिसम्बर 2014 का डंडा अउर सरिया से मारै कै आरोप लगाइन। उनकै कहब बाय कि प्रबंधक अउर प्रधानाचार्य हमरे बेटवा का मारिन।
सरायरासी गांव  कै गणेश सिंह कै कहब बाय कि स्कूल प्रबंधक उदय प्रताप अउर प्रधानाचार्य निशा सिंह हमरे बेटवा हर्ष सिंह का डंडा अउर सरिया से मारिन जवन शरीर मा निशान बन गै बाय।
प्रधानाचार्य निशा सिंह बताइन कि छात्र कै दस हजार रूपया बकाया होय गै बाय। ई छात्र स्कार्पियों कै बम्फर तोड़ दिहे रहा। फीस न जमा करै का पड़े यही से घरवाले झूठै इल्जाम लगावत बाटे। हम सिर्फ छात्र का डांटे फटकारे रहेन ताकि फीस जमा कै दियै।
अयोध्या कोतवाली थाना कै मुंशी देवेन्द्र सिंह बताइन कि सरायरासी गांव  कै गणेश सिंह के  शिकायत पै तकपुरा स्थित एक प्राइवेट स्कूल के प्रबंधक अउर प्रधानाचार्य के खिलाफ मारपीट के धारा मा एन.सी.आर. दर्ज बाय। छात्र का मेडिकल परीक्षण के ताई भेजा गै बाय।