पीडि़ता का मिलै वीरता पुरस्कार

धरना मा पहुंचे सी.ओ सिटी जवाहर लाल

जिला फैजाबाद, गांधी पार्क। शहर मा यूकेजी छा़त्रा का अगवा कइके बलात्कार करै के मामला मा छात्रा का न्याय देवावै के ताई क्षेत्र कै मनई धरना पै बैठा हईन।
छात्रा कै चाचा दीपक कै कहब बाय कि आदर्श नगर कालोनी देवकाली मा दुर्गा प्रसाद के बिटिया कै विवाह रहा। यही समारोह मा राजकुमार विश्वकर्मा निवासी ककरहवा पूरा परिवार के साथे विवाह समारोह मा गा रहे। उनके साथ उनकै पांच साल कै बिटिया भी गै रही। पहिले से परिचित टी.बी. मैकेनिक जवन कि पहिले से टी.बी. बनावै घरे आवत जात रहा। लड़की का चाकलेट कै लालच दइके अपने साइकिल पै बैठाय के लइके जाइके शंकरगढ़ बाजार के पास खेत मा लै जाए के बलात्कार करिस। जब लड़की बेहोस होइगै तौ वहीं छोडि़के भागि आय। सुबह जब लड़की का होश आय तौ कउनौ तरह एक दुकान पै आइके आपबीती बताइन। सूचना पै घरवाले सहनवा चैराहा पहुंचके कोतवाली लाइन। पुलिस आरोपी लालजी का गिरफ्तार कै लिहिन। लड़की जिला अस्पताल मा आज तक भर्ती बाय। सरकार के तरफ से कउनौ मदद न मिलै से 8 मार्च का कुछ सामाजिक कार्यकर्ता धरना पै बैठ गइन। 25 लाख आर्थिक मदद अउर वीरता पुरस्कार दियै कै मांग करिन। मौके पै पहुंचे सी.ओ. सिटी जवाहरलाल का मुख्यमंत्री का सम्बन्धित पांच सूत्री ज्ञापन सौंपिन। अउर मांग करिन कि आरोपी का फांसी दीन जाए। पीडि़ता कै पढ़ाई कै जिम्मा सरकार के तरफ से उठावा जाए। साकेत महाविद्यालय कै छात्रसंघ महामंत्री अनुज श्रीवास्तव, कृष्ण कान्त जैसे कार्यकर्ता 10 मार्च तक धरना पै बैठा रहिन।