आय,जाती,निवास प्रमाण पत्र खा लगी लाइन
महोबा शहर, तहसील। एते कक्षा आठ से लेके बी.ए. बी.एड. ओर आई.टी.आई. के छात्र आपन आय,जाति, ओर निवास के लाने एक महीना से तहसील ओर एकल खिड़की के चक्कर काटत हे। काय से ई कागज के बिना वजीफा को फारम रद्द हो जात हे। फारम जमा करें की आखिरी तारीख 31 अक्टूबर हती। पे आय,जाती,निवास प्रमाण पत्र न बन पायें के कारन केऊ छात्र वजीफा को फारम नई भर पाओ हे।
आई.टी.आई कालेज की रानी ओर दीपा बताउत हे कि हमने आपन आय बनवायके खे लाने 27 सितम्बर 2014 खा फारम भर के जमा करो हतो। एक महीना हो गये, हमाओ आय प्रमाण पत्र नई मिलो हे। हम दस बारी तहसील के चक्कर काट चुके हे। एकल खिड़की के कर्मचार आज कल कहके टार देते हे। कबरई से आई रीता बताउत हे कि मोई बी.ए. की दूसरी साल हे। वजीफा को फारम भरे खे लाने मेने जाती को फारम 30 सितम्बर 2014 खा डारो हतो। जाती न बने के करान वजीफा को फारम नई भर पाओ हे। अगर फारम भर जातो तो छह हजार रूपइया मिल जातो।
एस.डी.एम. राकेश कुमार गुप्ता ने बताओ कि सरवर डाउन होयें के कारन नई बन पाओ हे। डी.एम. के आदेश के अनुसार हम कागज में बना के बच्चन खा देत हे। जीसे वजीफा को फारम भर सके