रास्ता बनवावैं के मांग

जिला चित्रकूट, ब्लाक कर्वी, गांव बनकट, मुहल्ला नई दुनिया। हिंया से शारदा देवी मंदिर तक लगभग दुइ सौ मीटर रास्ता नहीं बनी हवै। रास्ता बनवावैं खातिर प्रधान नत्थू से 15 सितंबर 2014 का कहा गा। ब्लाक मा भी बी.डी.ओ.से कहा गा, पै कउनौ ध्यान नहीं देत हवै।
मुहल्ला के राम निहोरे यादव, मनीष गुप्ता अउर रामेश्वर का कहब हवै कि रास्ता मा पानी भरा रहत हवै। स्कूल जायें वाले छोट बच्चा या रास्ता का पार करै के समय कपड़ा उतार के निकरत हवैं। काहे से करिहा तक पानी भरा रहत हवै। कत्तौ कत्तौ तौ बच्चा पानी भरे रास्ता मा गिर तक जात हवैं। अगर रास्ता बन जाये तौ हम सबहिन के समस्या खतम होइ जई। प्रधान नत्थू का कहब हवै कि अबै अहिरन पुरवा मा काम लाग हवै। यहिके ब़ाद हुआ भी रास्ता बनवावैं खातिर रूपिया अई तौ जरूर बनवावा जई।
कर्वी बी.डी.ओ. राधेश्याम कहिन कि अबै हुंवा के दरखास हमरे लगे नहीं आई हवै। मुहल्ला के मड़ई लिखित दरखास दें तौ रास्ता बनी।