खबर लहरिया फैजाबाद धमकियाँ, डर और हत्या: फैजाबाद के मया गाँव में नंदकुमार को किया गायब

धमकियाँ, डर और हत्या: फैजाबाद के मया गाँव में नंदकुमार को किया गायब

जिला फैजाबाद , ब्लाक मया, गांव काजीपुर विस्वा कै नंदकुमार चौहान 12 नवम्बर से गायब अहै। उनके भाई कै कहब बाय की हमरे सब खुद से तलासै कै बहुत कोशिश करेन। पर जब नाय मिले तौ 17 नवम्बर का अज्ञात मनई के खिलाफ महराजगंज थाना मा रिपोर्ट दर्ज करायन। जब वहिसे आवत रहेन तौ श्रीचन्द्र निषाद, गुड्डू पासवान, हौसला पासवान अउर जयराम पासवान रास्ता रोकके गाली गलौज करिन। अउर धमकी दिहिन की अगर हमरे सबकै नाम केहू से बताउबा तौ जान से मार दियब।
नन्दकुमार कै पिता राजमन कै कहब बाय की 24 नवम्बर का सरयू नदी के किनारे एक लड़का कै शर्ट अउर मांस कै छोट-छोट टुकड़ा मिला बाय। हमै शंका भए तौ सूचना पुलिस का दिहन। पुलिस 30 नवम्बर का चारो आरोपी का गिरफ्तार केइके जेल भेज दिहिन।रोमा चौहान नन्दकुमार कै बहन कै कहब बाय की जब स्कूल जात रहेन तौ हमरे सबका देखके हंसत रहे अउर गाली दियत रहिन।जब भाई से बतायन तौ भाई का मारै कै धमकी दिये रहिन।
नन्दकुमार कै चाची गायत्री देवी बताइन कि सिर्फ यतना पूछे रहिन कि काहे हमरे बहिन का देखके हंसत रहया। येही बात के ताई घरे आइके धमकी दिहिन अउर रास्ता मा पकरिके मारके घरमा घुस गईन। नन्दकुमार कै भाई लक्षमन कै कहब बाय की माझा काजीपुर खेत गा रहे। वहीं से पता नाय चला। गन्ना के खेत मा खून से सना शर्ट मिला अउर छोट छोट मांस कै टुकड़ा मिला। छह महीना पहिले श्री चन्द्र से झगड़ा भा रहा।
सीओ दीपक कुमार सिंह कहिन कि महराजगंज पुलिस द्वारा चार अभियुक्त का गिरफ्तार कीन गा बाय। 12 नवम्बर का राजमन तहरीर देहे रहे। अउर गुमसुदगी दर्ज कराये रहे। अवैध सम्बन्ध के कारण नंदकुमार कै हत्या कइके लाश छुपाय दीन गए रही। चारो जने का गिरफ्तार कीनगा बाय। फोन कपडा बरामद कीन गा बाय।

रिपोर्टर- संगीता और मनीषा

08/12/2016 को प्रकाशित