गुजिया मा जहर खवा के जान से मारैं के कोशिश

जिला बांदा, शहर बांदा, मोहल्ला इन्द्रा नगर। हेंया के निशा 28 मार्च का एस.पी. का दीन गे दरखास मा कहिस कि चार महीना पहिले दूसर शादी करै वाला वहिका मनसवा निशांत 27 मार्च का गुजिया साथै जहर खवा के वहिका जान से मारैं के कोशिश करिस है।
निशा का कहब है कि मोर मनसवा निशांत गूलर नाका मा नोकिया मोबाइल कम्पनी मा काम करत रहै। अब कम्पनी बंद होइगे है तौ दुकान खोल लिहिस है। कम्पनी मा रहत रहत वा दूसर शादी कइ लिहिस है। यहिसे वा मोरे साथै मारपीट करत है अउर बच्चन का खर्च नहीं देत आय। मैं आपन किराये के घर मा दूनौ बच्चन का लइके रहत हौं, तौ हों आ भी कलमा नहीं रहैं पावत आहूं । कतौ पन्द्रह दिन मा घरै आवा तौ दारू के नशा मा धुत होइके आवत है अउर मारपीट करत है, पै 27 मार्च का तौ वा जहर खवा के जान से मारै के पूरी कोशिश करिस। जेहिसे मैं खूबै उल्टी करेंव अउर बेहोश होई गयेंव। तबै आस पास रहैं वाले लोग देखिन अउर मोरे महतारी का फोन करवाइन। यहिसे मैं एस.पी. का दरखास दइके उंई दूनौ लोगन का जेल मा बंद करावैं के मांग करत हौं।
एस.पी. का कहब है कि 498 ए के तहत मुकदमा दायर कीन जई। जेहिका फैसला कोर्ट से होई, पै अबै वहिका पकड़ा नहीं जा सकत आय।