खण्डजा बनै कै उम्मीद नाय

जिला फैजाबाद, ब्लाक मया, ग्रामसभा जरही। हिंआ पन्द्रह साल से एक ही प्रधान बनत हईन। तबौ दलित बस्ती मा सौ मीटर रास्ता मा खण्डजा नाय लगवावत हईन।
गांव कै दान बहादुर, शिव मंगल, राधा देवी बताइन कि हमरे सब बरसात के दिन मा गाठ भर पानी मकी आइत जाइथै। पूरा बरसात भर केहूं रिस्तेदार नाय आवत पानी भरै के नाते। हिंआ तक कि शादी विवाह मा भी बहुतै परेशानी होथै।
दानबहादुर कै कहब बाय कि हमार जमीन खण्डजा के किनारे बाय। कही थी कि खण्डजा के बीच से नाली बनवाय दिया तौ नाय सुनत बाटिन। सैकड़न साल से हमरे सब हिंआ रहत हई। लकिन यहि दलित बस्ती की ओर प्रधानन कै नजर नाय जात बाय। लगभग पचीसन घर कै मनईन कै आवा जाही रहाथै। पिछली साल तीन चार ट्राली मिट्टी डलवाय देहे रहेन। कुछ उम्मीद भै रहा हमरेव बस्ती कै किस्मत जाग जाये। लकिन फिर से जैसे कै तैसे रही गै।
प्रधान रामरंग यादव बताइन कि जेकर बाग बाय। विधायक के समझावै से राजी होई गईन। अब जल्दी ही विधायक अभय सिंह के द्वारा खण्डजा लगवाए जाए।