धरना मा प्रधान, करमचारी संघ
जिला बांदा। हेंया विकास भवन के करमचारी जिला विकास अधिकारी कुमारी निर्मला के खिलाफ धरना प्रदर्शन करिन। धरना प्रदर्शन 8 जुलाई 2013 से चलत है। या धरना प्रदर्शन मा विकास भवन के करमचारी आठौं ब्लाक के करमचारी, प्रधान संघ अउर लेखपाल संघ कुल मिला के लगभग एक हजार करमचारी शामिल हैं।
धरना मा बइठ ग्राम विकास अधिकारी संघ के अध्यक्ष प्रमोद द्विवेदी बताइन कि जिला विकास अधिकारी करमचारिन का अपमान करत है। कउनौ विभाग का काम करावैं, फाइल चेक करावैं जइसे के कइयौ काम करावैं मा वा गाली गलौज करत है। प्रधान संघ के अध्यक्ष राजनारायण द्विवेदी कहिन कि जिला विकास अधिकारी प्रधानन के फर्जी जांच करावत रहत है। जांच कबै भे, जांच को कीन, यहिके सूचना प्रधानन का जांच के बाद पता चलत है।
विकास भवन करमचारी संघ के अध्यक्ष रीता सिंह के अगुवाई मा 17 जुलाई 2013 का विकास भवन के सबै आफिस के ताला बन्द कइके धरना प्रदर्शन कीन गा। सबै करमचारी सी.डी.ओ. के आफिस गंे। होंआ सी.डी.ओ. के न मिलैं मा उनके खिलाफ भी नारा लगाइन अउर कहिन कि सी.डी.ओ. का भी न छोड़ा जई।
सी.डी.ओ प्रमोद शर्मा धरना प्रदर्शन के बारे मा कुछ भी बात करैं से मना कई दिहिन। जिला विकास अधिकारी या समय जिला से बाहर हैं। या मारे बात नहीं होई पाई।