जिला महोबा, ब्लाक कबरई, गांव सुनैचा (रिवई)। एते के आदमियन को आरोप हे कि प्रधान ओर सचिव के कारन गरीब आदमियन खा कोनऊ तान को लाभ नई मिलत हे। जीसे आदमियन ने 8 जून खा डी.ए. खा दरखास दई हे, जांच करा आवास की मांग करी हे। एक हफता के बाद भी कोनऊ जानकरी नई भई ओर न कोनऊ जांच के लाने गओ हे।
गांव के सुशीला, बिट्टन, छोटी पत्नि छंग्गू कहत हे कि हम गरीब ओर दलित जाति के आदमी हे झोपड़ी बना के रहत हे। रामपाल, हरीराम, प्रधान ओर सचिव हमसे तीस हजार रूपइया मांगत हे। हमने देय से मना करो तो हमाओ आवास के लाने फारम नई भरत हे। जीखे घर पक्के बने हे ओर गाड़ी हे ऊखे आवास के लाने फारम भर दये हे। सचिव सुर्दशन नामदेव बताउत हे कि गांव में आवास देय को लक्ष्य होत हे। ओई हिसाब से गांव मे आवास दये हे। आदमी दरखास देत हे जांच होत हे अगर जांच मे सही पाओ गओ तो दे दये जात हे। बिट्टन ओर हरीराम खा आवास पास हो गओ हे।