जिला महोबा, ब्लाक कबरई, गांव पिड़ारी मे 1 मई खा 24 साल की चन्द्रकली नाम की ओरत आगी लागे से मर गई हे। ओरत के बचायें मे आदमी सुखराम भी बुरी तरह से जल गओ हतो। इलाज के लाने जिला अस्पताल मे भर्ती कराओ। हालत खराब होंय के कारन डाक्टर ने झांसी रेफर कर दओ। जीसे रास्ता मे सुखराम की मोत हो गई हे। परिवार ओर छोट् बच्चन को रो-रोके हाल बेहाल हे।
सुखराम को बाप रामसजीवन बताउत हे सुखराम ओर चन्द्रकली मोये बड़े लड़का बहू हते। छह साल पेहल शादी भई हती। उखे एक लड़का ओर दो छोट्-छोट बिटिया हे। सुखराम अपनी ओरत बच्चन के साथे दिल्ली मे रहके मजदूरी कर परिवार पालत हतो। काय से मोये दो स्यान बिटिया बेठी हे शादी के लाने। चन्द्रकली के मायके खन्ना में शादी हती तो आये हते। 1 मई दिन रविवार खा दिल्ली जायें की तैयारी हती। दिन मे पता नई उ दोनउ के बीच का भओ। चन्द्रकली ने कमरा मे आगी लगा लई। बहू चन्द्रकली खा बचाउत बचाउत उ खुद जल गओ। ओई दिना दोनउ की मोत हो गई हती। ईखी सूचना पुलिस खा दई हती। लाश को पंचनामा भर पोस्टमार्टम कराओ हतो।
चन्द्रकली के बाप राजाबाबू कहत हे की जभे तक हम आये हते तो चन्द्रकली मर चुकी हती। दमाद भी मर गओ हे। कीखे ऊपर कारवाही करन। छोट् छोट् बच्चन के परिवारिस के लाने कोनउ नइयां। बचपन मे ही मताई बाप को साया उठ गओ हे।
कबरई थाना एस.ओ. अमित कुमार भड़ाना बताउत हे की मे मौके मे गओ हतो, जांच चलत हे, हमाये एते एसी कोनऊ दरखास नई आई हे जीमें मुकदमा लिखो जा सके।
रिपोर्टर – सुनीता प्रजापति