जिला बांदा, ब्लाक नरैनी, कस्बा अतर्रा 12 अप्रैल का एक लड़की साथै बलात्कार का मामला सउहें आवा हैं। कइयौ दरकी पुलिस का दरखास दे के बाद भी आरोपी नहीं पकड़ा गा आय।लड़की के परिवार वाले अतर्रा थाना से लइके एस,पी.तक के चक्कर लगाइन है पै कुछौ सुनवाई नहीं होत।
लड़की का कहब है कि मैं कक्षा 10 के पेपर दिए हौं।वहिकर वजीफा नहीं मिला रहै यहै कारन वजीफा का पता लगावे गई रहि हौं।तबै मोहिका बच्चा सिंह मिला अउर कहिस कि वजीफा दूसरे जघा मिलत है।
तबै मैं वहिके साथ मोटरसाइकिल मा बइठ के चली गइंव तौ वा मोहिका दूसरे जघा दुइ दिन तक राखे रहा हैं।
सादे कागज मा मोहिसे दसख़त करवा लिहिस है।मोर डाक्टरी जांच होइ गें है पै अबै रिपोर्ट नहीं मिली आय।हमें नियाव न मिली तौ जहर खा के आत्महत्या कर लेबै।हम जइसे गरीबन के लाने सरकार न होय।
लड़की का भाई बताइस कि पुलिस लड़की का बयान लिहिस फेर कहत रहै तुम्हार बच्चा सिंह से का दुश्मनी है केस का दबा देव काहे से तुम्हार लगे इलाहाबाद लखनऊ जाये खातिर रुपिया नहीं आय।
प्रेस वाले कहत रहै दुई लाख लइ लेव आपन लड़की के शादी कइ देव।हम अतर्रा जनता अदालत सी.ओ.एस.पी सबका दरखास दीने हन।मुख्यमंत्री योगी से भी मिले गये हन वै कुछौ सुनवाई नहीं भे आय। आरोपी मोर भाभी अउर छोट बहिनी का धमकी देत है जाति का लइके गाली देत है।
रिपोर्टर- गीता
10/05/2017 को प्रकाशित
