खबर लहरिया बुंदेलखंड हैण्डपम्प के निकार ले गये पाइप लाइन

हैण्डपम्प के निकार ले गये पाइप लाइन

DSCN0051जिला महोबा, ब्लाक कबरई, कस्बा कबरई भगत सिंह नगर। एते को हैण्डपम्प पन्द्रह साल को लगो आय। जोन तीन महीना पेहले खराब हो गओ हतो, सुधारे की जघा जल संस्थान के कर्मचारी पाइप निकार के ले गये हे। जीसे हैण्डपम्प पानी नई देत हे। पिये के पानी खा हजारन की संख्या में जनता एते ओते भटकत हे।
सुरेन्द्र, ओर माया ने कहो कि अभे तक तो जेसे तेसे समय कट गओ हे, पे अब पानी की बोहतई परेशानी हे। काय से गर्मी में तो बोहतई पानी लगत हे।
सत्यवती ने कहो कि हमाये मोहल्ला में एकई हैण्डपम्प हे। ऊखे भी जल संस्थान के कर्मचारी पाइप निकार के ले गये हते। जीसे चलाये में थक जात हे, पे पानी नई निकरत हे। हमें पिये के पानी खा आधा किलोमीटर दूर जाने परत हे। अब तीन चार घर में शादी हे, जीसे लगत हे कि हैण्डपम्प बन जाये तो नींक होहें।
अरविन्द्र ओर कामता ने कहो कि चैन भी टूटी हे। केऊ दइयां जल संस्थान कार्यालय गये हे, पे हमाई कोनऊ सुनवाई नई होत हे। पाइप न होंय को बहाना कर टार देत हे।
कबरई जल संस्थान के बड़े बाबू नारायण बाबू ने कहो कि हमाये एते पाइप नइयां। महोबा लिख के भेजो हे। जभे आ जेहे तो डरवा दये जेहे।