जिला बांदा। या साल बारिश के कमी लोगन का पियैं के बूंद बूंद पानी का तरसा दिहिस हैं। जल निगम कइत से लाखन रूपिया खर्च कइके दसन साल पहिले बनाई गे पानी के टंकी मा कतौ पाइप लाइन जाम है, तौ कतौ के टंकी चालू नहीं कराई जाय। जइसे कि समस्या सउहैं आवत हैं, पै आज तक या समस्या से निपटै खातिर कउनौ ठोस कदम नहीं उठावा गा आय।
ब्लाक तिंदवारी, गांव महुई। हेंया के अवधेश अउर पप्पू का कहब है कि हम लोगन का पानी भरैं खातिर गांव के बाहर एक किलो मीटर दूर जाय का परत है। जेतना समय हमार पानी भरैं मा लागत है उतने मा घर के चार काम पूर होई सकत हैं।
रामबाई अउर रोशनी बतावत है कि या साल बारिश न होय के कारन गांव मा लाग हैण्डपम्प अउर भी पानी देब बंद कइ दिहिन है। या मारे हम लोगन का पानी के बहुतै परेशानी है। यहिसे हम लोग 19 मई का तिन्दवारी जल संस्थान मा दरखास दइके पाइप लाइन बदलावैं के मांग कीन है, पै कउनौ सुनवाई निहाय।
तिन्दवारी जल संस्थन के जेई के.के. मौर्य का कहब है कि 1992 मा महुई गांव के पानी सप्लाई टंकी बनी रहै, पै लोग कनेक्शन नहीं लिहिन आय। या मारे पाइप परे-परे जाम होइगे हैं। अबै भी लोग कनेक्शन लइहैं, तौ पाइप बदला के सप्लाई चालू करा दीन जई।
रिपोर्टर – शिवदेवी