सामुदायिक स्वास्थ्य केन्द्र में नइया सुविधा

जिला महोबा, ब्लाक जैतपुर। एते सामुदायिक स्वास्थ्य केन्द्र में डिलेवरी कराये वाली ओरतन खे कोनऊ सुविधा नई मिलत आय।
जैतपुर के सामुदायिक स्वास्थ्य केन्द्र में ननौरा से डिलवरी करायें आई राधा ने बताओ कि में 2 जुलाई 2013 खे आपन डिलेवरी कराये गई हती। जीमें भर्ती कर लओ ओर बाद में कोनऊ ध्यान नई दओ आय। जभे 3 जुलाई 2013 खे मोये बिटिया भई हे तो दो घण्टा के बाद छुट्टी कर दओ हे। बिटिया होय के बाद कोनऊ सुविधा नई मिली आय। एसई श्री नगर से डिलेवरी कराये आई राधा रानी ने बताओ कि डिलवरी कराये खें बाद न तो दूध दओ न दाल, चावल ओर न तो फल दये हे। जभे कि सरकार के एते से सब कुछ मिलत हे। एते से सरकारी एबुलेंस गाड़ी भी नई भेजी जात हे। ओर अगर भेजत हे तो रूपइया ले लेत हें।
सामुदायिक स्वास्थ्य केन्द्र के चिकित्सा प्रभारी पी.के. सिंह ने बताओ कि डिलेवरी करायें वाली ओरतन खे छुट्टी दो दिन बाद करी जात हे। ओर ऊखो फल, दूध ,दाल, चावल ओर बिस्कुट खाये खे लाने दओ जात हें। हमाये केन्द्र में एक हफ्ता से सरकारी एम्बुलेंस गाड़ी नई हे। एई से में आपन गाड़ी लायें खे लाने भेजत हों। जीखा पांच रूपइया किलोमीटर के हिसाब से किराया लौ जात हे।