ससुराल वाले नई देत हिस्सा

जिला महोबा, ब्लाक जैतपुर, गांव रगौलिया खुर्द। एते के 27 साल की चन्दा खा ससुराल वाले घर में हिस्सा नई देत हे। मजदुरी कर दो बच्चन खा पालत हे।
चन्दा बताउत हे कि मोओ महुआ बांध ससुराल हे। मोओ आदमी मनोज 11 जुलाई 2013 खा दिल्ली मजदूरी करन गओ हतो। ओतई ऊखी मोत हो गई हती। आदमी के मोत के बाद में तीन महीना ससुराल में रही, ऊखे बाद ससुराल वाले मोये गाली गलौज करन लगे। कहत हते कि हमाये लड़का खा तेने मारवा दओ हे। जभे कि दिल्ली मनोज अकेले गओ हतो। में हिस्सा मांगत हों तो नई देत हे, कहत हे कि तोओ एते हिस्सा नइयां। मेंअपने बच्चन खा लेके मायके में रहत हों मजदूरी करके परिवार चलाउते हों। हिस्सा पायें के लाने मेनें तीन महिना पेहले कोर्ट में मुकदमा लगा दओ हे।
ससुराल मलखान बताउत हे कि चन्दा एते नई रहें चाहत हे। ऊ सोचत हे कि हिस्सा मिल जाये तो बेंच के मायके मे रेहे। एई से में हिस्सा नई देत हो। चन्दा आये ओर एतई रहे तो चन्दा खा हिस्सा दओ जेहे।