शंकर राय के पत्नी प्रमिला देवी
जिला शिवहर, प्रखण्ड तरियानी, गांव कोलसो, वार्ड नम्बर दस। इहां के शंकर राय के पास अपन जमीन न हई। उ दोसर के जमीन में बसल छथिन। एई के लेल उनका इंदिरा आवास न मिलई छई।
शंकर राय के पत्नी प्रमिला देवी कहलथिन कि हम अपना नइहरे में रह गेली। हमरा पास अपन जमीन न हय। बंधु राय गिरहस हमरा एगो मरइया बनावे के जमीन देले छथिन ओही में रहई छी। हमर ससुर के नाम ठगा राय के जगह पर राम कर देले छथिन जई कारण हमरा इंदिरा आवास न मिलईय। दुबेर नाम सुधार के लेल आंगनबाड़ी में देली, लेकिन कुछो न भेल। अब हार गेल छी कहां जाउ? छौगो बच्चा हय, पति मजदूरी करई छथिन। केनहाईतो गुजर बसर करई छी।
प्रखण्ड विकास पदाधिकारी विनय कुमार सरस कहलथिन कि जब तक अपन जमीन न होतई तब तक उनका इंदिरा आवास न मिलतई। उनका पास अपन जमीन न हई त उनकर नाम अगर भुमी हीन वाला में होतई तब उनका सरकारी जमीन देल जतई। नाम सुधारके लेल उनका प्रपत्र ’ख’ अउर ’ग’ भर के अंचल कार्यालय में जमा करे के होतई।