इन्द्रजीत के परिवार वाले
जिला बांदा, ब्लाक तिन्दवारी, गांव जौहरपुर, मजरा कांगे्रस डेरा अउर चंदौखी डेरा । हेंया 9 जून 2013 से गायब इन्द्रजीत के लास गांव के ही कुंआ मा 9 जुलाई 2013 का देखी गे। यहै दिन चंदौखी डेरा का बिहारी सिंह उर्फ भिखारी के मउत सुरहा नाला मा डूबै से होइगे। गांव मा एकै दिन दुई लास मिलैं से सनसनी फइल गे। पुलिस मौके मा जा के दूनौ लास ले आई।
दलित इन्द्रजीत के भाई रामबरन, रामलखन बतावत हैं कि रामनारायण जाति ठाकुर 9 जून 2013 का इन्द्रजीत का घर से दारू पियावैं खातिर लिवा गा। वहै दिन से इन्द्रजीत घर नहीं लउटा। मोहल्ला के ही मड़ई कुंआ मा लास देखिन। पुलिस का बुलवा के जबै लास निकाली गे, तौ रस्सी से पूर देह बांधा रहै। रामनारायण अब हमैं धमकी देत है कि कउनौ कारवाही करिहौ तौ तुम भी जान से हाथ धो बइठिहौ। महतारी से जबरइन पंचनामा वाले फारम मा दसखत करा के रामनारायण फरार है। प्रधान शिवभवन सिंह अउर मोहल्ला के झंडी लाल बतावत हैं कि इन्द्रजीत जेतना कमात रहै वतने के दारू पी लेत रहै। शक यहै कीन जात है कि या 9 जून 2013 का दारू के नशा मा कुंआ मा वा कूद गा है। तिन्दवारी थाना का पुलिस मोहम्मद मुस्तफा खांन कहत है कि मैं गांव तक गयेंव अउर पोस्टमार्टम मा भी शामिल रहौं। यहै पता चला है कि वा दारू पी के खुद कुंआ मा कूद गा है। दूसर कइत यहै गांव के चंदौखी डेरा के बिहारी सिंह उर्फ भिखारी (उमर छप्पन साल) के मउत 9 जून 2013 का सुरहा नाला मा डूबै से होइगे। नाला के वा पार चरत भैंसिन का लें खातिर रपटा पार करैं मा गोड़ फिसल गा है।