खबर लहरिया बुंदेलखंड मुकदमा वापस न लेहे तो करबी अनशन

मुकदमा वापस न लेहे तो करबी अनशन

महोबा शहर बड़ी चन्द्रिका, छतरपुर रोड। एते 8 मई खा लगे लाउडस्पीकर में भई अराजक तत्वों के द्वारा पथराव के कारन दोनो पक्ष में लड़ाई भई हती। जीसे हिन्दु युवा वाहनी के आदमियन ने तहसील चैरहा में जाम लगा दओ। बाद में दोनो पक्ष ने लिखित दरखास देके समझौता कर लओ हतो। पे पुलिस हिन्दु युवा वाहनी के लगभग पचास आदमियन ने 307 के साथे केऊ तरह की धारा लगा दई हे। जीसे 12 मई खा हिन्दु युवा वाहनी के साथे सांध्वी प्राची ने रोड शो करो हे।
नीरज रावज ओर आशीष महाराज ने कहो कि जभे हमाओ समझौता हो गओ हतो तो काय मुकदमा लिखो हे। अगर हमाओ मुकदमा वापस लओ जाये, नई हम अनशन करबी। रोड शो भाजपा कार्यालय से निकारी हती। जीमें कछू दूरी पे सी.ओ. संदीप कुमार ओर कोतवाल शिवशंकर शुक्ला भारी पुलिस के साथे पोहोंच रोड शो करें खा मना करो, तो हिन्दू युवा वाहनी संगठन भड़क गये जीसे पुलिस के साथे काफी नोंक झोंक भई। बाद में साध्वी प्राची गाड़ी से उतर पैदल ही महोबा में रोड शो करो हे। कहूं दुबारा से कोनऊ घटना न होंय के कारन भारी सुरक्षा के साथे पुलिस भी रही।
महोबा सी.ओ. संदीप यादव ने कहो कि जांच चलत हे, कोनऊ खा गलत तरह से सजा न दई जेहे।