कस्बा के नालिन को हाल
जिला महोबा, ब्लाक जैतपुर, कस्बा जैतपुर बजरिया मोहल्ला। ई कस्बा में दो सफाई कर्मी हे जीसे पूरे कस्बा में सफाई नई हो पाउत हे। जीसे आदमी अपने द्वारे की सफाई अपने हाथ या फिर चंदा करके सफाई कराउत हें। ईखे लाने अधिकारी भी कोनऊ ध्यान नई देत हे।
पीतम राजपूत ने बताओ कि एते दो महिना से सफाई नई भई हे। एते की नालिया गन्दगी से बोहतई भरी हे। नालिन को पानी पूरे रास्ता में फेलत हे। जीसे निकरत नई बनत हे। पानी ओर गिलाव हमाये दरवाजे पे भरो रहत हे। हम आपन दरवाजा खोले तक खा तरसत हंे। कामता, जयसिंह ओर नरेश सिंह ने बताओ कि गन्दगी के कारन बोहतई मच्छर लगत हें। मच्छर लागे से मलेरिया जेसी बीमारी हो जात हे। हमने मिल के दो महीना पेहले प्रधान खा लिखित दरखास दई हे, पे आज तक कोनऊ सुनवाई नई भई आय। सफाई कर्मी कुलपहाड़ के रहे वालो हें। ऊ सफाई करन कभऊं नई आउत हे। जभे गन्दगी से हमाओ दम घुटन लगत हे तो हम चंदा कर के रूपइया इक्कट्ठा करत हें ओर सफाई कर्मी खा बुला के सफाई कराउत हे।
जैतपुर प्रधान हरिमोहन ने बताओ कि सफाई न होय खा आदमी झूठ बोलत हे। कस्बा में दो सफाई कर्मी हे। पूरे कस्बा में रोज सफाई नई हो सकत। दो महीना पेहले ओते सफाई भई हती। अभे पुलिस चैकी से बजरिया केती सफाई होत हे।