बेगरे हैण्डपम्प मड़इन के आफत

शहर बांदा अउर कस्बा खुरहण्ड। हैण्डपम्प खराब होय से मड़इन का पियैं के पानी के बहुतै समस्या है। मड़ई एक महीना से या समस्या झेलत है।
बांदा शहर के हरदौली कांशीराम कालोनी। ब्लाक नम्बर अड़तिस मा भोला, राजब अली अउर ब्लाक नम्बर बावन मा अकिल रहत हैं। इं बतावत हैं कि कालोनी मा बीस हैण्डपम्प लाग हैं। जेहिमा सिर्फ पांच चालू हैं। हैण्डपम्प बिगड़े होय के दरखास चेयरमैन अउर तहसील दिवस मा दिहिन, पै कारवाही नहीं भे। या कालोनी मा दुई सौ चालिस विकलांग रहत हंै। पानी तरे से तीन मंजिला ऊपर तक ढ़ो के लई जात हैं। जल निगम सोलहवीं शाखा के अधिषाशी अभियन्ता रामविहारी कहत हैं-“जांच कइके कारवाही कीन जई, अबै बजट निहाय।”
यहिनतान खुरहण्ड रेलवे स्टेशन के चार हैण्डपम्प खराब हैं। रोज का हजारन यात्रिन का पियैं का पानी स्टेशन मा नहीं मिलत। खुरहण्ड रेलवे स्टेशन के रहैं वाले श्याम अउर संतोष कहत हैं कि चार महीना से चार हैण्डपम्प खराब हैं। एक हैण्डपम्प तौ तरे का धंस गा है।
खुरहण्ड रेलवे स्टेशन मास्टर एम.पी. गुप्ता कहिन कि एक महीना पहिले चित्रकूट धाम मण्डल का हैण्डपम्प सुधरवावैं खातिर दरखास दीन गे है। एक हफ्ता पहिले दुई मिस्त्री हैण्डपम्प बनावैं आयै रहैं, पै उंई हैण्डपम्प नहीं बने आय।