बांदा के विकास भवन मा 22 मार्च से रोजगार सेवक बड़ोखर खुर्द के बीडीओ से परेशान होइके अनशन मा बइठ है। इनकर समस्या अबै तक कउनौ अधिकारी सुने नहीं आय आहीं।
अलोक दिवेदी का कहब है कि बड़ोखर खुर्द का बीडीओ शैलेश अउर सहायक अधिकारी प्रदीप यादव रोजगार सेवकन का परेशान करत है, या समस्या पूर जिला मा है। यहै कारन 19 फरवरी से हम बड़ोखर खुर्द मा अनशन करत रहे हन, जबै हुंवा सुनवाई नहीं भे तौ हम जिला मा आये हन। चतुर्भुज सिंह का कहब है कि हमरे साथै नींक व्यवहार नहीं कीन जात आय। हमें परेशान करत है अउए समय से मानदेय नहीं देत आहीं। सुबेरे छह बजे से रात आठ बजे तक काम करित है, पै शासन प्रशासन के मड़ई हमार संविदा खतम करै चाहत है। विद्यालता का कहब है कि हमार गलती निकालत रहत है अउर धमकी भी देत है। हमार मानदेय भी रोक देत है। उषा का कहब है कि सबै रोजगार सेवकन के साथै कउनौ न कउनौ समस्या है, पै या समय हम बड़ोखर बीडीओ का हटावै खातिर अनशन करे हन।
कालीचरण का कहब है कि हमार मांग पूर न होई तौ हमार महामंत्री आत्मदाह करिहैं।
सीडीओ राजकुमार का कहब है कि अधिकारी आपन नियम के हिसाब से काम करत है। मड़इन का परेशानी है तो बता सकत है।
रिपोर्टर- गीता देवी
