महोबा शहर, तहसील चैराह में रिंकी मोबाइल कि दुकान मे 14 सितम्बर 2014 खा चोरी भई हे। चोरी में लगभग 20 हजार को नुक्सान भओ हे। पुलिस ने चोरन खा पकर लओ हे। जीमें पुरानी चोरी को भी खुलासा 17 सितम्बर 2014 खा भओ हे ओर अलग-अलग धारा लगा के चोरन खा जेल भेज दओ हे।
रिंकी मोबाइल के दुकान दार प्रसांत ने बताओ कि में 14 सितम्बर खा झांसी माल लेन गओ हतो। लेट होंय के करन रात में झांसी में रूक गओ। सुबेरे मोये छोट भाई ने दुकान खोली तो सब समान फैलो हतो। चोरी में हमाओ नये ओर पुराने लगभग 30 मोबाइल, 40 बैटरी, चिप ओर पन्द्रह सौ नगद रूपइया गओ हे। ईखी सूचना हमने कोतवाली में दई हे। प्रसान्त ने कहो कि अगर में शाम खे झांसी से वापस लौट आतो तो मोओ लाखन को माल चोरी में चलो जातो। जोन अभे नओ समान लाओ हों ऊ बच गओ हे।
महोबा कोतवाली के कोतवाल श्रीप्रकाश राय ने कहो कि स्वामीदीन पुत्र घनश्याम, बृजेश पुत्र रामाधार, कमलकिशोर पुत्र आनन्तराम बल्लू माली उर्फ रामविशाल पुत्र करोड़ी लाल खा पकर लओ हे। एक महीना मे भई लगभग डेढ़ दर्जन चोरी को खुलासा करें खे लाने अभे पूछतांछ चलत हे। ईखें धारा 401, 457, 380, आई.पी.सी. के तहत मुकदमा लिख गओ हे। चोरन खा जल्दी जेल भेजो जेहे।