खबर लहरिया बुंदेलखंड फुंको ट्रांसफारमर, छाओ अंधियारो

फुंको ट्रांसफारमर, छाओ अंधियारो

जा हे ट्रंसफारमर

जा हे ट्रंसफारमर

जिला महोबा, ब्लाक चरखारी, कस्बा खरेला। एते के मानिक, डींगुर राय ओर सादराय दो ओर तीन मोहल्ला के बीच धरो ढाई सौ के.वी. को ट्रांसफारमर एक हफ्ता से फुंको परो हे। जीखा सुधरायें खे लाने जिम्मेंदार विभाग कोनऊ ध्यान नई देत हे। जीखा असर जनता में परत हे।
धमेंन्द्र ओर हरीराम बताउत हें कि हमाये एते के तीन मोहल्लन के बीच में सात महीना पेहले एक ट्रांसफारमर धराओ गओ हतो। जीसे लगभग नौ सौ कनेक्शन धारक बिजली जलाउत हें। राजू ओर मोहन ने बताओ कि ट्रांसफारमर फुंके से आधा मोहल्ला बीमार होंय के कगार में हे। काय से ठण्डी की कमी ओर मच्छर की बढ़ोत्तरी के मारे रात भर नींद नई आउत हे। ईखे लाने नगर पंचायत ओर बिजली विभाग में केऊ दइयां कहो हे, पे कोनऊ ध्याान नई देत आय।
नगर पंचायत के बाबू सत्य प्रकाश खरे बताउत होें कि हमाये एते से महोबा एक्सीयन खा सूचना दई गई हे।
खरेला बिजली विभाग के जे.ई. प्रवीण कुमार ने बताओ कि 4 दिसम्बर 2014 खा फुंके ट्रांसफारमर की जगह स्टोर से दूसर ट्रांसफारमर धराये खे लाने आ गओ हे। 5 दिसम्बर खा ओते दूसर ट्रांसफारमर धरा दओ जेहे।