प्रधान कहै निहाय गांव समाज के जमीन

चरम रोग पीड़ित सुमेरा

जिला बांदा, ब्लाक नरैनी, ग्राम पंचायत पल्हरी। हेंया प्रजापति मोहल्ला मा रहैं वाले मड़ई कालोनी अउर पट्टा के मांग प्रधान से करत हैं। प्रधान आज तक उनके समस्या मा कउनौ ध्यान नहीं दिहिस आय।
प्रजापति मोहल्ला मा रहैं वाला सुमेरा कहत है कि मैं प्रधान से कइयौ दरकी कालोनी के मांग करे हौं। कालोनी का फारम भरैं का कहेंव, पै वा नहीं सुनिस आय। मैं बीस साल से चरम रोग से पीडि़त हौं। प्रधान से सरकारी लाभ पावैं खातिर कइयौ दरकी कहेंव। जबै वा नहीं सुनिस तौ कालोनी के मांग करेंव। वा भी नहीं मिलत आय। सुमेरा के मेहरिया चैबी कहत कि दवाई मा 60 हजार रूपिया लगा चुकी हांै। बांदा से लइके नैनी तक इलाज कराये हौं। अब रूपिया न होय के कारन दवाई भी बंद हैं। राजकुमार अउर जागेश्वर बतावत हैं कि गांव मा गांव समाज के बहुतै जमीन है। वा जमीन मा बड़ी जाति के लोग कब्जा करे हैं, पै हमैं खातिर कहत है कि गांव समाज के जमीन निहाय। हम प्रधान से पट्टा अउर कालोनी के मांग कीन तौ नहीं सुनत। अगर कतौ शिकाइत करत हन तौ हमरे दुआरे मा चढ़ के दबंगई के मारे गाली गलौज करत है। वोट मांगै आई पार्टी से भी हम कालोनी अउर पट्टा के मांग कर चुके हन।
प्रधान राजेश्वरी का मनसवा अनमोल कहत है-“मोरे गांव मा गांव समाज के जमीन निहाय कि पट्टा होई सकैं। कालोनी के मास्टर सूची मा उनके नाम हैं। जबै ऊपर से कालोनी आवैं तौ दीन जाय। गांव मा दलितन खातिर 2011-12 मा 6 इन्द्रा आवास अउर 2013-14 मा 26 इन्द्रा आवास आये रहैं जेहिके पहिली किस्त आ चुकी है। उनमा से कुछ लोग कालोनी बनवा लिहिन हैं कुछ रूपिया लइके पंजाब चले गे हैं। अब बी.डी.ओ. हमसे दूसर किस्त खातिर सुबूत मांगत हैं नहीं तो नोटिस भेजै का कहत हैं।”