खबर लहरिया बुंदेलखंड पुलिया बिना घर में घुसत पानी

पुलिया बिना घर में घुसत पानी

एस डी एम प्रबुद्ध सिंह

एस डी एम प्रबुद्ध सिंह

जिला महोबा, ब्लाक कबरई, कस्बा कबरई। एतेे लगभग दो साल पेहले नगर पंचायत केती से आर.सी.सी बनी हती। रास्ता में पुलिया की बोहतई जरूरत हती, पे आज तक पुलिया नई बनी हे।

वार्ड नम्बर 12 के कामता कहार ओर रामू कहत हे कि जभे से सी.सी. रोड बनो तभे से निकरे में बोहतई परेशानी होत हे। पुलिया न बने के कारन कोनऊ भी साधन नई निकर पाउत हे। गर्मी में हम लोग लकड़ी डार के निकरत हते। अब बरसात के कारन अगर नाली में कछू डारत हे, निकरे के लाने तो पानी नई निकर पाउत हे। दयाराम, विशाल ओर राजीवन काछी कहत हे कि नालियन की भी सफाई नई होत हे पानी घरन में घुसत हे ओर रास्ता में फेलत हे, जीसे निकरत नई बनत हे। हमने केऊ दइयां वार्ड मेम्बर कालीचरन से कहो हे, पुलिया बनवाये के लाने पे ऊ हां कहके टार देत हे। राजा कड़ेर कहत हे कि एते से हजारन आदमी काम के लाने दिन भर निकरत हे। पुलिया न होंय से बोहतई परेशानी होत हे।

वार्ड मेम्बर कालीचरन प्रजापति कहत हे कि मेंने 4 अगस्त खा एस.डी.एम. प्रबुद्व सिंह खा लिखित दरखास दई हे। काय से नगर पंचायत कबरई के ई.ओ. का चार्ज ओई लये हे।

महोबा एस.डी.एम. प्रबुद्व सिंह ने कहो कि ओत की पुलिया जल्दी बनवाई जेहे।