पिता के मार से भागिन नाबालिक लड़की

लड़की कै दादा बाबू उल्लाह

जिला फैजाबाद ब्लाक मया, ग्रामसभा शेखपुर। हिंआ 28 अप्रैल का रात नौ बजे दुई सगी नाबालिक बहिन पिता के मार से घर छोडि़के भागि गइन। पिता पड़ोसी पै बेंचै कै आरोप लगाइन।
लड़की कै दादा बाबू उल्लाह कै आरोप बाय कि हमरे विटियन का पड़ोसी कै अल्ताक उर्फ लाला गफ्फार बेंच लिहिन। थाना पै गयन हमार सुनवाई नाय भै। फैजाबाद एस.पी. का सूचना दिहे के बाद रिपोर्ट दर्ज भै। बड़ी बिटिया फरजाना चैदह दुसरी बिटिया तमन्ना तेरह कै हइन।
गफ्फार उर्फ गोरा कै महतारी कमरजहां अउर गांव के मनइन कै कहब बाय कि जउने दिन उनकै बिटिया भागिन वहि दिन सिराजुद्दीन अपने बिटिया का मारे पीटे रहिन। हम बिमार रहेन अकबरपुर जिला अस्पताल मा भर्ती रहेन घरे केहू नाय रहा। हमरे हिंआ से जमीन कै झगरा चजत रहा वही के जलन से हमरे घरवाले का फंसावत हइन। जबकि उनकै बिटियै दुई बार पहिले भी भागि चुकी हइन। एक बार जहर भी खाये रहिन। अउर यै हमेशा मारा पीटा कराथिन।
गोशाईगंज थाना कै एस.ओ. मोहम्मद आलम खां बताइन कि जब लड़की घर छोडि़के गइन तौ दुई दिन तक कउनौ सूचना नाय दिहिन। 28 अप्रैल कै घटना हुवय 30 अप्रैल कै एस.पी. के हिंआ तहरीर दिहिन। जमीनी विवाद के कारण पड़ोसी का फंसावत हइन। वै लड़की घर से सारा कपड़ा लइके भागि गइन। लड़की के पिता के तहरीर पै गफ्फार उर्फ गोरा अउर अल्ताफ उर्फ लाला के ऊपर मुकदमा अपराध संख्या 72/16 धारा 372, 504 आई पी सी लाग बाय। सुराग मिला बाय कि लड़की बम्बई मा बाय। बरामद करै के ताई पुलिस टीम भेजा गै बाय।