करत मीटिंग
जिला चित्रकूट, ब्लाक कर्वी, गणेश गेस्ट हाउस। हिंया लखनऊ के संस्था एक्शन एड के सहयोग से उपज संगठन संस्था 26 मार्च 2014 का मीडिया वालेन के साथै मीटिंग करिन। मीटिंग करैं का उद्देश्य रहै कि घटत लिंग अनुपात खतम कीन जाये। यहिके खतिर मड़इन का जागरूक होय के जरूरत हवै। यहिमा खबर लहरिया पत्रकार समेत लगभग पन्द्रह पत्रकार शामिल रहैं।
उपज संगठन के सम्पत का कहब हवै कि आज 2014 मा चित्रकूट जिला मा एक हजार पुरूष के बीच मा कुल नौ सौ सात महिलायें हवै। यहिका कारन हवै कि बिटियन का गर्भ मा अउतै गर्भपात करा दीन जात हवै। जबै कि अल्ट्रासाउन्ड करैं वालेन अउर करावैं वालेन के ऊपर रोक लागैं के जरूरत हवै। यहिके साथ नींक शब्द का इस्तेमाल कीन जाये जइसे कि कन्या भ्रूण हत्या शब्द का घटत लिंगा अनुपात कहा जाये। समाज मा बिटिया का भी लड़का के जइसे हक अउर अधिकार मिलै। जबै बिटिया न रइहैं तौ बहू कहां से मिली। यहिके खातिर सबै का जागरूक होब जरूरी हवै। उपज संगठन संस्था तीन बरस से चित्रकूट जिला मा काम करत हवै। अगर डाक्टर या फेर ए.एन.एम. कउनौ मेहयिन का गर्भपात करत हवै तौ मड़ई आवाज उठा सकत हवैं। अउर सीतापुर के उपज संगठन आफिस मा सूचना दइके बतावैं।