जिला चित्रकूट, ब्लाक मऊ, गांव गोइया खुर्द, पुरवा भौंठी। हिंया के शीला का आरोप हवै कि वहिके अस्सी मीटर जमीन मा प्रधान हरीलाल पाल घर बनवावत हवै। यहिके रपट बरगढ़ थाना मा 27 दिसंबर 2014 का लिखाइगे, पै कउनौ सुनवाई नहीं भे।
शीला का कहब हवै कि 1996 मा नसबंदी करवाये रहौं। यहै से पूर्व प्रधान सत्यनारायण ग्राम सभा के आधा बिगहा जमीन दिहिस रहै। वहिमा मैं घर बनवा लीने हौं अउर अस्सी मीटर जमीन निकरैं खातिर छोड़ दीने रहौं। अब प्रधान हरीलाल पाल 1 दिसंबर अस्सी मीटर जमीन मा घर बनावैं मा लाग हवै। पूर्व प्रधान सत्यनारायण का कहब हवै कि मैं शीला का जमीन दीने रहौं। वा शीला के ही जमीन आय। प्रधान हरीलाल पाल का कहब हवै कि वा जमीन मोर हवै अपने जमीन मा घर बनवावत हौं। बरगढ़ थाना के इस्पेक्टर राजाराम दुबे का कहब हवै कि या नाम के औरत अगर थाना मा दरखास लिखावैं नहीं आई हवै। अगर थाना मा दरखास लिखावैं आवत तौ कारवही कीन जात।