जिला चित्रकूट, ब्लाक रामनगर, गांव देऊंधा के मड़इन का आरोप हवै कि उनके गांव मा कउनौ विकास नहीं आय उनका कउनौ भी योजना का लाभ नहीं मिलत हवै। इं सबै खातिर मड़ई प्रधान उर्मिला देवी से 12 जून का कहिन, पै प्रधान कउनौ ध्यान नहीं देत आय।
गांव के राममिलन, ज्ञानेन्द्र कुमार अउर रेखा का कहब हवै कि गांव मा विकास का नाम नहीं आय। गरीब मड़इन का प्रधान कालोनी नहीं दिहिस हवै जबै कि हम लोग पात्र भी आहिन कउनौतान से झोपड़ी बना के आपन गुजारा करित हन। प्रधान उर्मिला देवी से 10 मई का कहा गा । यहिके बाद अबै हाल ही मा 12 जून का कहा गा, पै कउनौ ध्यान नहीं दीन गा हवै।
ललिता देवी अउर सन्नो कहिन कि हमरे लगे एकौ बिसुवा जमीन तक नहीं आय। सरकार कइती से मड़इन का समाजवादी पेंशन मिलत हवै, पै हम लोगन का नहीं मिलत आय। यहिसे सोचित हन कि अगर समाजवादी पेंशन मिले लागै तौ नून रोटी का सहारा होइ सकत हवै। हम समाजवादी पेंशन का फार्म अप्रैल 2016 मा भरे रहेन। वहिका अबै अबै तक कउनौ पता नहीं लाग हवै। प्रधान उर्मिला देवी के मनसवा भोला कहिस कि गांव के आबादी लगभग पांच हजार अउर वोटर तेइस सौ हवै। समाजवादी पेंशन के बयासी फार्म वृद्धा पेंशन के पन्द्रह फार्म भर के ब्लाॅक मा 20 अप्रैल का जमा कीन हौ। काॅलोनी अउर सड़क बनवावैं के मांग भी कीन गे हवै। रामनगर ब्लाॅक के ए. डी. ओ. चन्द्रभान गुप्ता कहिन कि सरकार कइती से बजट आई तौ विकास करवावा जई।
रिपोर्टर – सहोद्रा देवी
