नदी मा डूब के मर गा

जिला चित्रकूट, ब्लाक कर्वी, नया बाजार। हिंया रहैं वाली मालती गुप्ता कहिस कि बेटवा अर्पित उर्फ मनू 8 सितम्बर 2014 का घर वालेन से बिना बताये मंदाकिनी नदी गणेश विर्सजन खातिर चला गा रहै। रात मा वहिका कउनौ पता नहीं लाग। 9 सितम्बर 2014 का पता लाग कि एक लड़का के लाश मंदाकिनी नदी मा मिली हवै। जा के देखेंव तौ वा अर्पित उर्फ मनू के लाश रहै।
नया बाजार मा रहैं वाले श्रीराम गुप्ता अउर मालती गुप्ता का कहब हवै कि बेटवा अर्पित उर्फ मनू के उम्र लगभग ग्यारह बरस रहै। वा कक्षा तीन मा पढ़त रहै। पढ़ै खातिर स्कूल नहीं जात रहै। हिंया हुंवा फिरत रहै। यहै से वहिका ढूढ़त रहेन, पै 8 सितम्बर 2014 का बेटवा बिना बताये गणेश विसर्जन खातिर नदी चला गा पूर रात घर नहीं आवा तौ शाम के आस पास पता करेन, पै वहिका कउनौ पता नहीं लाग।
9 सितमबर 2014 का सुबेरे 5 बजे अपने बेटवा का कर्वी बस अड्डा मा मड़इन से पूछेंव तौ उंई कहिन कि मंदाकिनी नदी मा एक लड़का के लाश मिली हवै तौ जा के पता करौ। यहै से हुंवा गइंव तौ पुलिस वाले बेटवा के लाश धरे रहैं। हमार पाला पोषा बेटवा मरगा। पुलिस वालेन का छोट लड़कन का नदी के लगे न जाये दें का चाही। अगर नींक व्यवस्था होत तौ बेटवा बच जात।
सीतापुर पुलिस चैकी के पुलिस का कहब हवै कि लाश का पंचनामा कइके पोस्ट मार्टम खातिर भेज दीन गा हवै।