नई मिलत पेंशन

जिला महोबा, ब्लाक पनवाड़ी, गांव नकरा को मजरा आफतपुरा। एते की ओरतन खां रानी लक्ष्मीबाई पेंशन योजना को लाभ नई मिलत आय। जीसे ओते की ओरतन खा आपन घर को खर्चा चलाये में बोहतई परेशानी आउत हे।
एते वार्ड नम्बर पन्द्रह की रहे वाली शीला, देवकुंवर, राजकुमारी गिरजा रानी ओर किरन ने बताओ कि हम खा रानी लक्ष्मीबाई पेंशन नई मिलत आय। जभे कि हमने एक साल पेहले फारम डारे हते। हमाये आदमी मजदूरी करके रूपइया लाउत हें। जभे घर को नून तेल चल पाउत हे। अगर हमाई कितऊ मजदूरी लगत हे, तो हमें भी मजदूरी करें जाये खा परत हे। काये से एसी मंहगाई में एक जने के कमाये में चार लड़का बिटियन को खर्चा नई चल पाउत आय। जभे सरकार के एते से आउत हे तो ऊखो लाभ मिले खा चाही। एई से हम चाहत हें कि हमें भी रानी लक्ष्मीबाई पेंशन मिलन लगे तो नींक हो जेहे।
प्रधान वृन्दावन ने बताओ कि तीन सौ सत्रह लोगन खा पेंशन मिलत हे। अभे तिरासी फारम को रूपइया ब्लाक में बी.डी.ओ. खे दए हते। से नई आओ आय। चार-पांच दिन पेहले बी.डी.ओ. से बात करी हती। तो ऊ कहत हते कि जेसे फारम आ जेहे तो ऊ लोगन खे पेंशन मिलन लगहे।