किसानन ने दई दरखास
जिला महोबा, ब्लाक चरखारी, कस्बा खरेला। ई क्षेत्र के सैकड़न किसानन ने नहर को पानी न मिलत हे। जीसे 23 नवम्बर 2014 खा खरेला रजवाहा की पटरी में दोपहर 2 बजे से जाम सड़क बन्द करी हती। मौके में सी.ओ. धन्जय ओर प्रबुद्व सिंह ने मौके पोंहोच जाम खुलाओ हतो।
गांव पहरेता की केशररानी ओर दुलइया ने बताओ कि ई नहर खा एक महीना चलत से हे। अभे तक एक बूंद पानी हमाये गांव तक नई पोहोचो हे।
घसीटा सिंह ओर मुन्ना सिंह ने बताओ कि कुआं, बारी, बरायें, ऐंचाना जैसे तमाम गांवन में हजारन बीघा खेती बिना पानी के बंजर परी हे। अब दो चार दिन में नहर बन्द होंय वाली हे अगर हमाये गांव तक पानी न पोहोचहें तो हम का करबी।
एस.डी.एम. प्रबुद्व सिंह बताउत हें कि जोन आदमियन ने पानी बांध रखो हतो। ऊखे खिलाफ अज्ञात में मुकदमा लिखो हे। ऊसे तो 25 नवम्बर से बन्द हो जेहे पे एक्सीयन से बात करके किसानन तक पोहोंचायें की कोशिश करी जेहे।
एसई भारतीय किसान यूनियन के किसानन ने बिजली कटौती खा लेके 25 नवम्बर खा डी.एम. खा दरखास दई हे। ऐलान करो कि अगर जल्दी समस्या को समाधान न होहे तो हर बिजली विभाग में घिराव कर धरना करो जेहे।
शिवकुमार विश्वकर्मा, रामशरण सिंह, गिरधारी ओर जिला अध्यक्ष जगराम तिवारी ने बताओ कि एक तो किसानन खा पानी नई मिलत हे। अगर मिलत हे तो बिजली की कटौती करी जात हे। जीसे फल सूखत हे। दई दरखास में लिखो कि बिजली विभाग के कर्मचारियन की हाथ बिनती करे के बाद भी नई सुनत हे।
ऐलान करो हे कि अगर हमाई समस्या को समाधान न होहे तो हम हर विजली विभाग में धरना करें खा मजबूर हो जेहे। डी.एम. ने दरखास खा गम्भीरता से लेके जल्दी ही समस्या को समाधान करायें को अश्वसयन दओ हे।