जिला महोबा, ब्लाक जैतपुर, कस्बा बेलाताल, बाई पास गल्ला मण्डी के आदमियन को आरोप हे की एते सत्तरह साल से नालियन की सफाई नईं भई हे। साढ़े तीन सौ मीटर नाली गन्दगी से बुजी परी हे। बरसात को पानी घरन में घुसत हे। जीसे आदमी बोहतई परेशान हे।
प्रमोद बताउत हे की एते की नाली सत्तरह साल पेहले बनी हती। जभे से नाली बनी हे तभे से आज तक एकऊ दइयां सफाई कर्मी सफाई करन नईं आओ हे। हमें तो एते के सफाई कर्मी को नाम भी पता नइयां।
राजकुमार ओर मनोज बताउत हे की दो साल पेहले पूर्व प्रधान हरिमोहन से से सफाई के लाने कहो हतो। सफाई न होंय के कानर बरसात को पानी नई निकर पाउत हे जीसे पूरो पानी हमाये कमरन मे भर जात हे। पिछली साल तो कम बारिस भई हती तो जेसे तेसे कट गओ हतो। ई साल की बोहतई चिन्ता हे। पांच महीना पेहले नये प्रधान से कहो हतो। ऊ हां कहके टार देत हे। मानकुंवर कहत हे की एते एक दो घर होंय तो अपने से नाली साफ कर लेय। लगभग अस्सी घर बने हे। हमाये एक-एक, दो-दो कमरा बने हे। जीमें पूरो गहस्थी को सामान धरो रहत हे। पानी भरे से हम रात भर सो नईं पाउत हे। ईखे आलावा नाली बुजी होंय के कारन कीड़ा पैदा होत हे। बदबू आउत हे। प्रधान मुन्नी खातून को देवर रहीम बक्स बताउत हे की जनवरी से कस्बा मे सफाई अभियान चलत हे। जीखे तहत पूरे कस्बा में सोलह सफाई कर्मी सफाई करत हे। सफाई कर्मी को मनरेगा से रूपइया दओ जेहे। चार दिन बाद ओते की सफाई भी करा दई जेहे।
सफाईकर्मी मुकेश बताउत हे की पूरे कस्बा मे दो सफाई कर्मी हे। पूरे कस्बा की सफाई नईं कर सकत हे।
ए.डी.ओ. पंचायत मंसूर अली बताउत हे की राज्य वित्त के तहत प्रधान खुद सफाई कराउत हे। सफाई न होंय की शिकायत हमाये एते नई आई हे।
रिपोर्टर – श्यामकली