वनांगना का मिला पुरस्कार

जिला चित्रकूट, ब्लाक कर्वी। हिंया वनांगना संस्था महिला हिंसा रोकै का काम बीस बरस से करत हवै। या संस्था नियाव खातिर आवाज उठावत हवै। या कारन 6 अप्रैल 2013 का लखनऊ शहर के होटल ताज मा एच.टी. वुमेन्स पुरस्कार मिला हवै। पुरस्कार अखबार हिन्दुस्तान टाइम्स की ओर से दिहिन हवै। या पुरस्कार फिल्म अभिनेत्री शबाना आजमी, संगीत निदेशक वाजिद खान अउर कन्नौज जिला के सांसद डिम्पल यादव दिहिन हवैं।
वनांगना संस्था नेतृत्व टीम समूह के शबीना मुमताज का कहब हवै कि एच.टी. वुमेन्स पुरस्कार ताज होटल मा मिला हवै। पुरस्कार लें के समय वनांगना सामूहिक नेतृत्व करै वाली पुष्पा, महेश्वरी, अवधेश अउर शबीना मुमताज का दीन गा हवै।
या पुरस्कार चित्रकूट अउर बांदा जिला खातिर गर्व के बात हवै। काहे से कि वनांगना संस्था महिला संगठन हवै। आज वनांगना के साथै पैंतिस दलित मेहरिया, तीन हजार घरेलू हिंसा से परेशान संघर्षशील मेहरिया अउर पांच सौ दलित, मुसलमान बिटियन का समूह हवै। जउन कि नियाव खातिर हर समय वनांगना के साथै मिलके आवाज उठावत हवै। आज वनांगना का मजबूत संगठन केवल बांदा अउर चित्रकूट जिला तक ही सीमित नहीं आय बल्कि बाहरी दुनिया मा भी पहिचान हवै।