खबर लहरिया बुंदेलखंड दुकान जले को नइयां मुआवजा डी.एम.

दुकान जले को नइयां मुआवजा डी.एम.

10-06-15 Kabrai - Rivai Aag webजिला महोबा, ब्लाक कबरई, गांव रिवई सुनैचा। एते 23 मई खा आंधी आये ओर बिजली के तार टूटे के कारन लगभग बीस दुकाने जर गई हती। जीमें 20 लाख को नुक्सान भओ हे। जीखे मुआवजा के लाने डी.एम. खा दरखास दई हे।

चुनूबाद, रामबाबू, प्रमोद, राजेन्द्र ओर रामकिशोर ने बताओ कि 23 जून खा रात में आंधी आई ओर सुबेरे 4 बजे अचानक से दुकानन में आगी लग गई। 20 मिनिट में बीस दुकान जर के राख हो गई हे। जीमें हमाओ 20 लाख को समान जल के राख हो गई हे। हमने पानी वाली मशीन खा फोन करो हतो तो डेढ़ घण्टा बाद आई हती। उत्ती समय लेखपाल, डी.एम., एस.डी.एम. सब गये हते। अमर सिंह, भजन सेन, बरदानी, रामबाबू ओर गोरेलाल कहत हे कि हम एक-एक रूपइया जोर के दुकान धरी हती। जीसे आपन परिवार पालत हते। अब हमाओ परिवार भुखमरी के कगार में आ गओ हे। एई से हम सोचत हे की कछू मुआवजा मिल जाये तो अच्छो हो जेहे। एई से हमने 9 जून खा डी.एम. खा दई हे।

डी.एम. वीरेश्वार सिंह ने कहो कि दुकान जले को कोनऊ मुआवाजा नई मिलत हे। मकान ओर घर गृहस्थी जले को मुआवजा मिलत हे। एई से हम कछू नई कर सकत हे।